You are here

Expert
Digital Executive Editor

性價比超高!率先住東京時尚酒店

17th May, 2017

過往遊日所住的酒店房總是又細又窄 (幾千蚊晚嘅六星級酒店另計),即使肯花千幾蚊住闊落少少,房間格局亦庸俗不堪,毫無設計可言。可能你會話我去旅行住幾晚使乜咁奄尖,我認對住嘅要求高,因為在香港生活根本連想住得舒服啲都難,有機會出走點解唔可以有要求?

今趟東京之旅出發前上網搵酒店,見到有間時尚型格feel酒店叫One@Tokyo,最細間的房價每晚約港幣六百蚊,最大人房每晚港幣約1,600!唔係啩?官方照片都係電腦設計圖,心諗伏伏哋喎⋯⋯於是search住客留言,總共4條好評,但仍好懷疑⋯⋯再google下地址,原來酒店位於押上,距離新宿、涉谷都幾遠,車程要40分鐘!喺東京搭地鐵嚟講算幾耐,不過睇到有人上載實景相,同電腦繪圖一樣咁有水準,一於book!

從成田機場坐Sky Access約一小時到達押上駅,拖喼行8分鐘見到酒店,外牆以不規則木條設計,lobby佈置用上木材製傢具及灰色梳化,完全係我杯茶!酒店員工的英文水準好好,取匙後上房,可惜電梯內的設計突然跌watt。幸好打開房門心情再度亢奮,實在太合我心水喇!

原木配灰白色佈置帶點無印feel,沿住窗邊以兩塊木板設計成桌面和坐椅,房間面對Tokyo Skytree Tower,日夜的觀景都一流。酒店剛開業一個月,所有設施都好新,作為美容編輯,最驚喜係見到全套Shiseido浴室用品連梳洗工具!當然有優點亦有缺點,究竟呢間酒店住唔住得過?睇相逐格話你知。

酒店距離押上駅約8分鐘路程,都算方便。Google map會教用A1出口,但如果拖喼就一定要由有升降機的B3出,只相隔一條小馬路就唔使行樓梯。
押上駅位於Tokyo Skytree Tower晴空塔旁,有shopping mall及大型超市,可以逛足一日。
One@Tokyo外牆好有型,整間酒店由日本著名建築師隈研吾設計,日本根津美術館叉及淺草文化觀光中心都係佢嘅傑作。
酒店大堂以原木配灰白色佈置,好有無印feel!
我book了Loft雙人房,連稅每晚約$1300,同樣價錢應該只book到新宿區酒店的縮水房。
房間全部用上原木傢具,可能因為剛開業一個月,房內傳來陣陣木味,正!
咖啡機及電水壺隱藏在木櫃內,貫徹簡約空間概念。
浴室設計簡潔而有空間感,廁板採用自動感應系統。
每位住客都有一個化妝包,內裡有齊全套Shiseido浴室用品連梳洗工具。
拉開窗簾,左邊可以見到Tokyo Skytree Tower,右邊就係押上的寧靜小社區,好relax。
跟酒店總經理齊藤先生傾偈後才知,原來投資者來自香港。現階段soft opening做緊半價優惠,今年7月才正式開幕。
齊藤先生帶我去尚未開放的rooftop garden參觀,喺呢度睇住Tokyo Skytree Tower暢飲真係一流享受!
酒店樓下有拉麵店、AEON超市同24小時便利店,搵食冇難度。
我總共住了3晚,雖然酒店地點距離新宿遠,但押上的環境寧靜又舒服,而且酒店設計靚,每晚逛完街返去都有種返屋企的感覺。當然酒店剛開一個月,唔少配套亦有待改善,但仍係我下次遊東京的心水酒店!
One@Tokyo 地址︰1-19-3 Oshiage, Sumida  131-0045, Tokyo Prefecture