做女仔有邊個唔貪靚嘅啫？無論係前日喺香港傑出運動員選舉再奪「星中之星」大獎嘅李慧詩，定係大前日重登桌球壇世界一姐嘅「四眼cue后」吳安儀，佢哋兩個喺比賽場以外，都係一個貪靚嘅女仔嚟架！
記得兩年前同「四眼cue后」吳安儀訪問，佢啱啱第一次拎世界冠軍，佢話自己當初之所以會喜歡打桌球，除咗爸爸嘅影響之外，其實係有少少因為鐘意套紳士服，因為套制服好有型好cool，可想而知安儀佢幾注重自己嘅造型！最近佢仲同一個品牌合作，除低眼鏡同埋紳士服，換上一身白裙，仲化咗個淡淡嘅靚女妝，散發令人心心眼嘅小清新呀！
至於女車神，上年11月亦接受過我哋訪問架。Sarah話佢自己都好貪靚架，平時好鍾意著裙啦，對自己嘅衣著打扮都好有要求啦！前日傑出運動員頒獎禮，佢好朋友余翠怡仲漏咗口風畀我哋知，話Sarah朝早專登打電話問佢借直髮夾添。睇吓佢幾重視自己嘅造型，同埋個頒獎禮！
Text > Goosie
Photo > internet, Sarah Lee Wai Sze & Ng On Yee Facebook
