次次去旺角飲嘢，一定會去Cordis嘅Alibi，坐喺bar枱煩住bartender，不斷話畀佢知我今日想飲乜，再坐喺度un un腳等佢tailor made一杯最啱我當日心情嘅cocktail。前幾日聽聞有位英國靚仔新廚上任，佢除咗煮嘢好食，仲相信食物可以連繫人心，於是即刻上去試下佢嘅手勢如何連繫人心啦！
坐低前做咗少少資料搜集，原來位英籍新總廚叫James Oakley，最叻就係將亞洲風味融入歐洲菜，佢仲曾經喺倫敦Claridges Hotel嘅米芝蓮星級餐廳Restaurant Gordon Ramsay同埋埃塞克斯嘅De Vere Arms Hote做廚，由倫敦煮到去布吉島，仲去過馬爾他，最近就嚟咗香港發展。
夏日番茄沙律
蘇格蘭鵪鶉蛋及鳥巢
紅菜頭醃三文魚
香烤有機雞胸伴鵝肝及慢煮雞翼
新官上任，James當然為Alibi嘅菜單加入咗好多新意啦。先講吓開心share嘅小食，蟹肉配紫菜薄脆同埋椰青片，從來無諗過咁嘅味道配搭，真係驚為天人；夏日番茄沙律用咗布拉塔芝士、橄欖脆片、新鮮羅勒葉和Bloody Mary 冰沙製作而成，咁清新嘅沙律，夏天嚟講係一定要點嘅；個人唔食鵪鶉蛋，但如果你好嘅話，呢味重塑蘇格蘭名菜的蘇格蘭鵪鶉蛋同鳥巢亦要試，仲有素食選擇迷霧森林，用山羊芝士慕斯、蘑菇、松子醬及食用苔蘚炮製而成，而我最喜愛嘅就係紅菜頭醃三文魚（介紹返先，Cordis好著重環境保育架，呢個新主餐牌上面所有海鮮菜式都係用可持續環保海鮮，全部都有世界自然基金會認可架），紅菜頭嘅甜甜地再加上環保海鮮加持，肉質鮮嫰到爆，你試過就知點解我會咁鍾意。主菜方面，都係可以開心share嘅，James炮製咗西班牙羊肉二食，用照燒汁配以伊比利亞羊腩肉及曼徹格羊後腿，仲有西京味噌黑鱈魚伴新鮮蜆肉、牛油果蓉、水晶冰花、藜麥脆粒、海藻及秘製薯塊、同埋生牛肉他他，以手切美國西冷牛肉配我唔係咁好嘅蘇格蘭鵪鶉蛋，仲有脆牛肉和香烤酸麵團，食材唔算多，但見阿廚喺味道配搭嘅心思同技巧。
西班牙羊肉二食
生牛肉他他
book枱喇喂：
地址：旺角上海街555號香港康得思酒店5樓
電話：+852 3552 3028
電郵：cdhkg.restaurants@cordishotels.com
營業時間：
星期日至四 10:00am – 01:00am
星期五至六及公眾假期前夕 10:00am – 01:00am
Text: Goosie Lam