古語有云you are what you eat，身體唔舒服我哋識食得清淡啲；想減肥，甜嘢肥膩嘢食少啲，咁如果想增強床上戰鬥力應該食乜呢。
嗱！唔係引咗你入嚟，然後同你講食粒春藥搞掂呀，當然亦唔係食生蠔咁流嘅建議啦，同埋查實女仔食得多生冷嘢對身體唔好架嘛。好啦，一齊睇吓有咩正嘢食可以令你喺床上表現如虎添翼！
好多男仔覺得女仔搽鮮紅色唇膏係最sexy架，而呢粒士多啤梨其實都係買畀男伴食嘅，因為士多啤梨含有豐富嘅葉酸同維他命B，男仔食咗，可以大大提高貨源供應架。下次準備大戰三百回合之前，隊佢食返一盒先啦~~
原本HH最愛佐酒小食係花生，但又肥又唔健康，識得食梗係轉食Almond啦。Almond含有好多好多豐富營養，其中鋅正係增強性慾同埋提升高潮質素嘅重要元素哦！唔怪得平時飲完酒都心癢癢啦~~
無事常做愛！性愛有益健康的10個好處►► https://goo.gl/Vn8L05
係呀，又係牛油果呀！呢種superfood含有豐富嘅不飽和脂肪，唔單止係減肥女子嘅恩物，佢對心臟同埋血管嘅好處多籮籮，啲血流得暢順啲，同埋可以流去正確位置。
朱古力唔單止令人有戀愛嘅感覺，仲可以減壓同埋降低焦慮感，呢啲負面感覺都係影響你床戰表現嘅。曾經有個為期一個月嘅實驗，搵咗一班男女每日都食黑朱古力，全部參加者都表示每日食朱古力個人心情好咗，而女參加者更加話自己性趣大增呀，喺嗰月裡面愛愛多咗，質素亦提高咗！
有冇聽過話要成功跑完馬拉松，1成係靠體力，另外9成都係靠意志？床上運動亦一樣，所以想要有高質嘅床戰，保持頭腦清醒亦非常重要。食露筍啦，都係葉酸同維他命B，可以維持血液中嘅含氧量，仲會製造啲健康嘅細胞。
歷史學曾經提出過古埃及人就係用佢蒜頭增強自己嘅床戰能力，而研究人員亦證實咗呢種植物對性能力嘅功效喇，另外，食蒜亦可以促進心血管健康，將啲血導向應該去嘅地方，男仔食咗效果會更加明顯架，不過食完記得要刷牙囉。
Jamie Oliver煮乜都鍾意加辣，因為辣嘢令你有飽肚感，而且仲可以促進新陳代謝。其實辣椒仲可以令你性趣大增架，因為食辣後亦會令人心跳加速，就好似你同伴侶開戰前嘅身體狀態一樣，研究仲發現辣椒可以令你哋都last longer架。夏日熱辣辣好熱好熱，不如嗱嗱聲下一下火啦。
Text: Lucy Lamb
Photo: Internet