拍拖最頭痛嘅，係諗唔到有乜做好，尤其係啱啱喺交友app掃到個一見鍾情嘅男生，唔知頭唔知路嘅情況下以為係行街睇戲食飯最正路，結果一段大好姻緣就因為悶而灰飛煙滅。Come on畀啲新意，諗啲有意義啲嘅活動，唔單止可以認識對方更多，仲可以瞬間加分。
1. 去踩單車
做運動令人心情開朗啲，就算first date都無咁緊張。如果可以同佢兩個人一路並排慢踩，一路傾吓閒偈，間中停低selfie放閃，真係無得輸。不過香港地少人多，可以容納到兩架單車並排慢行的地方實在唔多，我建議黃昏前兩個鐘去東涌踩北大嶼山公路，路線簡單，人又少，仲可以睇個浪漫嘅日落。
2. 去學整陶瓷
整陶瓷梗係要兩個人一齊整一件作品啦，除咗可以睇到佢有冇耐性，一齊搓泥一齊等焗，仲可以將你哋嘅感情化作實體，最重要係可以試吓人鬼情未了嗰段經典戲碼吖嘛。
3. 去美食節
美食節有齊各國美酒佳餚，你哋除咗可以知道對方鍾意食乜菜、鍾意飲乜酒，仲可以知道佢對唔喜歡事物嘅接受程度；另外，喺啲小事上面亦可以睇到佢嘅性格，例如會唔會主動畀錢，夠唔夠細心幫你拎住啲垃圾，你哋仲可以幫對方抹咀增進感情哦。
4. 去海灘
坐喺沙灘聽吓海風，傾吓心事，其實都係一個唔錯嘅選擇。著住泳衣唔單只會令你physically坦蕩蕩，mentally亦會更開放，傾談內容自然亦會同平時唔同。事先聲明，男仔天生控制唔到自己望其他女仔，但佢哋可以控制到望嘅程度嘅，如果你勁易呷醋就繼續碌落下一點。
5. 去聽音樂
如果你哋都鍾意摸酒杯底飲杯嘢，可以去啲有live band嘅酒吧，一來有氣氛，二來因為環境有少少嘈，你哋兩個要焗住哄到好埋先聽到對方講嘢，哄哄吓就會有火花架喇！
6. 去主題公園
如果你兩個都鍾意玩機動遊戲嘅話，咁就正喇。適時扮暈依偎喺佢懷中，感情一日千里。另外，你仲可以測試到佢嘅膽量，有啲男仔明明好驚，但為咗氹你可以赴湯蹈火，加分。
7. 去野餐
野餐食嘅嘢都係比較casual，廚藝了得可以顯身手，就算一齊去citysuper買現成食物，配返杯美酒，一樣可以增加對彼此了解。
8. 一齊為晚餐下廚
如果你喺自己住嘅話，不妨試吓一齊烹調愛心晚餐，互相幫對方著圍裙，你洗我切，一頓充滿愛嘅晚飯，點都好過出街食貴貴嘅蠋光晚餐。同埋呢，好多愛情故事，都係喺廚房發生的。
9. 去啲從來未去過嘅地方
旅行真係可以見到一個人嘅真面目，例如有啲人明明唔識睇地圖都要堅持己見、盪失路唔幫手淨係識發脾氣……不過要去旅行太麻煩，不如搵一個你哋兩個都從來未去過嘅區（香港係好細，但有好多地方其實都未去過）。拎住張地圖，扮遊客咁探索吓未知嘅世界，影吓文青相呃like，仲可以認識彼此更多。
10. bookmark呢篇文
就係bookmark呢篇文囉，咁樣下次拍拖就唔使頭痕啦~~
Text > Lucy Lamb
Photo > Internet