天時暑熱，好多跑手都頂唔順酷熱轉戰游水，既唔使擔心日灑雨淋，又可以持續女生嘅終身減肥事業。而原來游水嘅好處多的是，雙膝唔會因為長期衝擊地面而勞損，亦都可以舒緩跑步帶來嘅其他肌肉疲勞，最正嘅係佢比跑步消耗更多卡路里架。
鍾意跑步嘅，一年四季有一大堆比賽等著你挑戰自己；但若然你都係水陸兩棲嘅運動女生，一年一度嘅渡海泳就是你測試自己嘅好機會喇。
今年嘅「新世界維港泳 2018」，繼續由新世界發展有限公司冠名贊助、香港業餘游泳總會主辦，比賽日期已鐵定10 月 21 日（星期日），朝早8點在維多利亞港舉行。繼續游返經典尖沙咀 > 灣仔路線，賽事全長約1,000米。而今年最大特色，係增咗600個優悠組名額，希望鼓勵多啲12歲以上符合資格的泳手一齊參與年度盛事，大會將為所有優悠組泳手提供安全浮泡。香港「蛙后」江忞懿同前「世盃冠軍」黃鍇威都報咗名喇，8月9號截步喇，要報就快！
為確保泳手安全暢游維港，所有參賽泳手須符合大會訂下的參賽資格，如沒有泳總認可的過往相關游泳紀錄者，須通過大會舉辦的水試方可參賽。競賽組泳手將以水試成績排列，以角逐參賽資格；而優悠組將以抽籤形式抽出通過水試的參賽者，抽籤結果將於「新世界維港泳」網頁內公布。
水試將於9月2日（星期六）、8日（星期六）及9日（星期日）分別在香港體育學院及城門谷游泳池進行。有關報名、水試等詳情可瀏覽www.hkharbourrace.com。
Text: Goosie Lam