無論你係18歲卜卜趣，22歲大把青春，進入輕熟階段，定係經步入中女，只要你處於單身狀態，個心總係會有一種難以言喻嘅苦悶，仲有少少籮籮攣。成日攬住閨密當水泡出相入對填滿生活，或者埋頭工作用workaholic做藉口都唔係辦法，不如學識以下5招，嗱嗱聲出貨喇喂~~
撒嬌女人最可愛
男仔怕煩，性格爽朗嘅女仔就最吸引架喇，注意，係爽朗，唔係豪爽，如果你太男仔頭嘅話，好容易會畀男仔friend zone！好難拿捏嗎？秘訣係，大夥兒嘅時候要爽朗玩得，有機會同佢獨處就溫柔撒吓嬌囉。
咪咁高要求啦
綜合單身女子擇偶條件，發現佢哋都係活喺幻想世界裡面。要高大、要有六嚿腹肌、要靚仔過彭于晏，仲要有錢有樓，而且心地善良，仲要錫到你燶。come on James! 呢個世界邊有咁完美嘅呢！就算有，都一早名草有主啦，幾時輪到你！
你有冇咁高質先
你揀人時人揀你，當你嘅要求去到天花龍鳳嘅水位時，有冇諗吓自己係咪都係咁高質素先。如果天生無嘅，後天就要努力了。
你究竟想要乜啫
如果連自己想要咩都唔知，又點會搵得到呢？如果想認真找真命天子嘅，拜託唔好再搵返個ex，或者搵啲同你個ex類似嘅人，同埋唔好再講「男人不壞 女人不愛」，唔聽話嘅後果自負。
要放吓聲氣架
想搵工都要話畀人知啦，搵真愛就更加要主動啲啦。無論你係用dating app定係參加speed dating，甚或搵隔離邨陳師奶都好，係就係有啲老尷，但你唔講，人哋又點知你係single and available，定係enjoy緊單身啫。
Text > Lucy Lamb