今年四月，香港嘅體壇真係好熱鬧呀。上個禮拜睇完rugby，今個Easter weekend到單車喇。講起單車又點少得「牛下女車神」、「香港最強大腿」李慧詩。尋日我哋就喺將軍澳單車館世界場地單車錦標賽近距離見證咗「車神」喺爭先賽200米資賽以10.764秒第2名爆入8強。
之後仲睇住Sarah喺8強發揮最強大腿衝刺力，尾圈爆贏咗對手「荷蘭一姐」的雲莉絲辛，我都忍唔住歡呼咗幾吓。現場反應真係熱血沸騰到一個頂點，最正係全場觀眾嘅歡呼聲，喺主場支持港隊感覺真係好正呀！
睇場地單車賽，最正係個鑊場細細，坐場邊嘅觀眾同車手只係一欄之隔。仲有呀，你嘅歡呼聲基本上可以傳遍整個場地，而且無論你坐邊都無死角，真係好好feel。
想喺主場撐起港隊？今晚（4月14日）7點，女子爭先賽準決賽同決賽，李慧詩將會喺鑊場同德國「女警」禾高（Kristina Vogel）再次碰頭，上演里約奧運嘅翻版擊戰，而家即刻衝去將軍澳瘋狂撐李慧詩，見證佢再奪彩虹戰衣啦。
除咗爭先賽，嚟緊星期六、日，「車神」李慧詩仲會喺500米個人計時賽同埋凱琳賽2項賽事上陣。想一齊見證「車神」全奪3金，就要留意以下嘅「車神」賽程。
「車神」李慧詩賽程
14/4（星期五） 19:00 女子爭先賽季軍戰及決賽
15/4（星期六） 12:30 女子500米計時賽資格賽
19:00 女子500米計時賽決賽
16/4（星期日） 10:00 女子競輪賽首圈、次圈及決賽
除咗支持李慧詩之外，仲有港隊師弟妹梁峻榮、張敬樂同馬詠茹，佢哋都會係唔同賽事輪流上陣，角逐男女子同埋團體賽好多錦標。一齊支持香港單車隊，快啲去將軍澳為港隊吶喊助威呀！
今年大會仲喺場館外面搞咗好多booth，可以買返件彩虹戰衣之外，仲有好多同單車有關嘅遊戲玩架。記得去Tissot個booth踩單車，模擬喺鑊場玩個人計時賽比賽，李慧詩都喺度留低咗腳毛架，佢嘅兩圈成績係33秒幾，有興趣可以去挑戰香港最強大腿呀！
Text > Goosie Lam
Photo > 馬詠茹、梁峻榮instagram, Tissot HK, The Bridge Agnecy, Goosie Lam
