眨吓眼，香港場地單車錦標賽就進入第3日賽事喇，雖然尋日（14日）嘅爭先賽四強賽事，Sarah李慧詩同德國嘅禾高對決時，禾高好似有犯規之嫌，而最終Sarah亦輸咗場比賽，不過Sarah一啲怨氣都無，仲即刻同禾高手拖手，恭喜對方，好有大將之風，亦見Sarah愈來愈成熟。
雖然失落爭先賽冠軍，但Sarah一啲都無洩氣，同禾高惡鬥完，即刻收拾心情返去場中間練習區，戴返個耳筒聽住歌繼續操練大腿，令自己更冷靜沉著應付嚟緊嘅季軍賽。唔知佢係咪聽緊佢偶像謝霆鋒嘅歌呢？
雖然係爭先賽季軍之戰，但Sarah嘅對手都唔弱架，來自立陶宛嘅古碧姬蒂（Simona Krupeckaite）老將經驗爆燈。不過爭先賽除咗講經驗，仲要靠大腿爆發力，李慧詩最終連贏兩場，喺香港單車代表隊之中先開紀錄，贏返個銅牌先。
而戰友德國「女警」禾高亦以直落兩局擊敗澳洲車手摩頓奪金。佢哋三個喺頒獎台上領完獎牌仲一齊玩隻舞獅帽，其實離開咗個鑊場，佢哋個個都好好朋友架。
最強大腿雖然屈居季軍，但睇下佢喺大家嘅歡呼聲之下咧嘴大笑，就知佢樂天性格打不死啦。話晒主場，銅牌都要有Victory Lap，等大家瘋狂支持呢位牛下女車神啦！
掛住慶祝復活節無睇到尋日嘅賽事，唔緊要，即刻睇返精華先啦！
想繼續為李慧詩打氣嘅，以下賽程最好bookmark咗佢啦~~
15/4（星期六）
12:30 女子500米計時賽資格賽
19:00 女子500米計時賽決賽
16/4（星期日）
10:00 女子競輪賽首圈、次圈及決賽
Text > Goosie Lam
Photo > UCI facbook, Goosie Lam