欣宜重演白雪公主死亡之吻
鄭欣宜自組新公司「Passionfruit Records」後，將她歷年來幾個飽受外界批判的階段重現在《你是什麼時候開始不愛我的？》MV中，被人笑她為食、扮美人魚、扮白雪公主獻「死亡之吻」等等，這些輿論曾幾何時都令她難過到喊唔停；但在批評聲音中長大的 Joyce 勇於面對一切，邊度跌低邊度起身，那管風雨飄搖，都係做自己最開心。
今次MV有多個不同造型，Joyce 表示是有含意：「唱呢首歌嘅時候，其實唔係淨係諗愛情，仲有好多唔同嘅演繹，包括面對自己，呢個MV對我嚟講係要踏出一個重大關口。幾個造型都曾經為我帶嚟重大陰影，我將佢哋重現，迫自己去面對。香港人咁忙，好容易將問題擺埋一邊，我都係咁，所以要跨出呢一步去面對、去承認；每一個造型都係我，少一個都唔會有今日嘅鄭欣宜。」
白雪公主和美人魚這兩個造型曾令Joyce全身中箭，今次再重演是否意味她已百毒不侵？「其實都仲係驚！但經驗話畀我聽，無論做咩都有機會俾人鬧，所以要做足準備工夫，等自己可以勇敢面對問題。雖然我自問冇資格做其他人嘅榜樣，但都會嘗試去做，希望大家聽同睇《你是什麼時候開始不愛我的？》嘅時候，得到啟發我就心滿意足喇。」
今次是第三度邀請黃偉文填詞，Wyman就用「The straw that broke the camel’s back（壓倒駱駝的最後一根稻草）」做切入點，寫一段關係慢慢碎裂的觸發點，即是歌名《你是什麼時候開始不愛我的？》。Joyce 表示：「淨係睇個歌名已經好有故仔、好有畫面。其實每次被失戀時，腦海就諗究竟係幾時開始唔愛我呢？到底係邊個時刻令人承受唔到呢？我係一個幾變態嘅人，鍾意挖問題出嚟面對。」
Joyce 當日在錄音室錄此曲時已經忍唔住喊，後來更感觸到跪地痛哭，她說：「我係喊到收唔到聲嗰隻，連出名cool嘅監製都嚟安慰我，錄音室同事亦感動到眼泛淚光。其實我之前嘅歌《無表面傷痕》，就係要正視感情問題，歌曲面世後我亦成功克服失戀。但今次錄新歌，唔知啲情緒喺邊度湧出嚟，所以大家聽嘅時候都可以將自己代入去，宣洩潛藏而不自知嘅情感。」