在對與錯以外，自身的情感同樣重要。每當有喜怒哀樂在心中升起，花一點時間、留一點空間，察覺自己的感覺，學習做自己最忠實的聆聽者。

Text：Connie Ho (HealThySelf 創辦人；香港註冊臨床心理學家)

「佢嗰日又唔記得約咗我啦，我等咗佢成晚……不過佢話 OT 咗成晚都好攰，唔記得都唔出奇……但都無理由一次係咁兩次又係咁，知自己忙不如唔好約我啦……佢話我太唔成熟，緊係做嘢緊要㗎啦，我明白佢都係為咗我哋將來……」

阿雯滔滔不絕地訴說那晚男朋友又一次失約的經歷，我用手勢示意她停一停：「我一路聽你講野，發現咗樣嘢好有趣。」阿雯一臉疑惑，我繼續說：「通常我哋嬲，一係就係咁鬧對方，一係覺得自責就不斷埋怨自己。好少會一句鬧人一句鬧自己咁。你道怒氣好似彈珠機入面粒彈珠咁，彈嚟彈去但係出唔到嚟。你多唔多時候係咁㗎?」

「係啊，我成日都唔知嬲邊個好，我覺得自己無錯，但係對方又好似情有可原，搞到我成日都谷住咁好辛苦。」

「你試下合埋眼，感受呢種谷住嘅感覺，再嘗試諗番好細個嘅時候，幾時試過有咁嘅感覺?」

「細個我喺度溫緊書，溫咗好耐想抖吓，咁啱媽咪行過見我發呆，就話我唔努力，嘥哂佢啲錢。」

「你嗰下有咩感覺啊?」

「谷住道氣囉! 但係只可以當聽唔到，駁佢咪盞俾人鬧多啲。」

我放了一張空椅在阿雯對面，著她想像當時的媽媽坐在椅子上，引導她放心道出那一刻想跟媽媽說的話，那「椅子上的媽媽」不會反駁。她沉思了一會，慢慢地說：「媽咪，其實我溫咗好耐㗎啦，你睇唔到之嘛 (她的聲線漸漸變得沙啞) 我做咗好多嘢你都睇唔到，成日話我呢樣嗰樣唔啱，解釋你又唔聽，總係覺得自己啱哂，成日話係為我好，知唔知我好唔開心?」(其後我指示她坐到媽咪那邊想像媽咪會說什麼，她自己又想說什麼，在此省略。)

「你有咩感覺啊?」「雖然媽咪唔會真係聽到，但係講哂出嚟個心舒服好多。」

「因為比起你阿媽，更重要係俾你自己聽到啊!」

「媽咪成日話凡事要兩面睇，一定唔會係你啱哂佢錯哂，所以我成日好怕怪錯人。」

「你成日都要顧其他人，咁你自己既感受呢? 就好似房間角落嘅灰塵咁，從來都被忽視，因為自細每每表達感受，都只會俾人鬧得更多。」

阿雯媽媽說的沒錯，凡事無絕對嘛。我並非叫阿雯不再顧及他人，但在對與錯之外，她自身的情感同樣重要。我邀請她日後每逢有喜怒哀樂升起，花一點時間、留一點空間，覺察自己的感覺，學習做自己最忠實的聆聽者。不急於改變什麼，只為了讓自己知道。

漸漸，你會發現，這半秒鐘回到自身的覺察是何等重要。

Out beyond ideas of wrongdoing and rightdoing,
there is a field. I’ll meet you there.
When the soul lies down in that grass,
the world is too full to talk about.
Ideas, language, even the phrase “each other”
doesn’t make any sense.

RUMI
Quatrain #158 from Open Secret

＊以上故事純屬筆者從臨床經驗中編寫，並不反映任何個別人士的經歷。

 

何欣容 Connie Ho
HealThySelf 創辦人；香港註冊臨床心理學家； 靜觀導師；大學講師
曾於醫管局總部、衛生署及社福機構工作，現為私人執業。相信每個人內在都擁有讓生命轉化的力量，希望透過靜觀及心理治療喚醒這力量，使每個人都活得更自在、滿足。
Facebook：https://www.facebook.com/healthyself.hk