大家都係女仔，老老實實喇，你對於自己嘅陰道，認識有幾多？
讀書時候無教，屋企人同朋友之間又少講，大家對自己妹妹嘅認知，不外乎朋友嘅朋友嘅資訊，例如話聽講處女嘅陰道最緊致，破處之後就會變鬆，又話搞得愈多會愈鬆（仲話所以唔好搞咁多，第時老公一試變知龍與鳳），亦有人話生過仔嘅女人下面會永久鬆弛，直到永遠。到底邊句真邊句假架？
喺研究姨媽姑姐嘅流言之前，不如先了解吓妹妹嘅結構。唔使緊張，唔係上緊biology堂，所以無解剖圖睇嘅，只需幻想吓，一條毛巾塞咗入一隻厚襪入面，你再用雙手緊緊捏住隻襪。嗰隻襪就係你嘅陰道喇，條毛巾係陰道壁，而雙手就係骨盆底肌喇。重點來了，無論係陰道、陰道壁定係骨盆底肌，佢哋同你身體其他部分嘅肌肉一樣，都係有彈性嘅！
一齊做個實驗，試吓用兩隻手指扣住你兩邊咀角，盡量向耳仔擘開（有時間嘅話可以擘100次），係咪就算點擘都好，你個咀仔都唔會突然之間變大呢。無錯，你嘅妹妹都一樣，係無咁易鬆架。（當然有例外情況，等陣講！）
問題1
咁點解初嘗禁果嗰次會痛到叫苦連天，到而家已經完全唔痛，仲唔係因為失去初夜變鬆？
初夜喎，第一次喎，係人都緊張啦，基本上你全身嘅肌肉都好繃緊，包括妹妹嘅肌肉，加上緊張到唔識分泌天然潤滑劑，梗係每一下抽插都痛不欲生。至於點解而家唔痛仲好enjoy？咪因為你有經驗囉。駕輕就熟喇，識得放鬆自己同妹妹嘅肌肉，又識分泌水水，咁梗係爽啦！
問題2
明明貞節牌坊都已經無咗好耐，點解每次曳曳都仲係會痛？
其實女仔嘅妹妹，同男仔嘅弟弟一樣，都會有大細之分。如果你已經有無數床上經驗仍然會痛，可能因為妹妹天生較窄。當你大腦將床上運動等同痛，而唔係享受嘅話，亦唔識分泌水水，於是痛上加痛，為咗愉快嘅性生活，快啲去買支lubricant啦！
不過最大原因，係因為前戲做唔足囉！
查實高潮感覺係來自大腦，想要有高潮，唔單止妹妹需要熱身，大腦都要熱身，個腦先識得畀指令叫妹妹分泌天然潤滑劑嘅。可惜女仔都係唔識主導床事，而男仔總係心急想曳曳，一兩分鐘錫錫就當前戲，妹妹都未準備好就已經入咗戲肉，咁梗係痛啦！
嗱！如果佢愛你嘅，事前起碼纏綿30分鐘，正常女子乜都ready啦！如果個男仔喺你同妹妹都未準備好嘅情況下強行進入，一係好無禮，二係可能佢無經驗，不妨同佢溝通吓。總之唔舒服就一定要出聲，唔好諗住忍，佢可能根本唔知你痛緊架！
問題3
生完仔係咪永遠都唔會緊返？
如果啱啱自然分娩咗個巨B，妹妹當然鬆弛咗，但6個月之後，妹妹嘅size就會回復正常架喇。
真正變鬆嘅原因
係年紀。年紀愈大，肌肉含量愈少，塊面皮會鬆，妹妹亦一樣。陰道肌肉彈性少咗，陰道壁亦變薄咗，慢慢就變鬆了。
除咗年紀，生仔亦都係其中一個原因。現代人多數遲婚，生BB時年過30甚至40都有，妹妹肌肉唔再係18/22時咁有彈力，回復嘅時間可能更長，如果年紀再大嘅，係真係會永久鬆弛，直到永遠的。另外，就算係年輕生，但生得愈多，妹妹嘅肌肉彈性亦會隨之而減低，未必能夠回復原狀。
講吓講吓，其實做媽媽真係好偉大，仲唔快啲同媽媽講聲我愛你~~~
Text > Lucy Lamb
Photo > Internet