近幾年有好多香港樂迷都表示支持廣東歌，希望香港樂壇好像90年代一樣，再次發光發亮！廣東歌都有好多唔同的曲風，不過未必每一首都受香港樂迷歡迎，就好似以下5首「騎呢」廣東歌，唔知大家覺得邊首歌最難頂呢？
Faith — 《Mama Easy》
呢首「騎呢」到爆的《Mama Easy》，是由組合Faith所唱。該組合最初由HiuYong、Wave、Sky3位平均24歲的小男孩所組成，後尾加入過新成員，不過未紅時已經在香港樂壇上銷聲匿跡，對於支持廣東歌的你是一種福氣！還記得當年歌曲一播出後，就引來廣大市民討論，成為大家茶餘飯後的笑柄。MV以超低成本製作，求其找一間見得下人的屋企作背景，然後3位五音不全又要扮有型的小男孩，在片中又跳又唱，直頭攞命。先不要說他們的造型(因為完全沒造型可言)，最令人叫救命的是那些不知所謂的舞步……真係好難唔笑到噴飯！
拾音社 — 《Kiss Kiss Kiss》
拾音社由何柏誠和李滔均組成，同時被認為是MK POP的代表。《Kiss Kiss Kiss》又是另一首以低成本製作的MV，只是多了很多無謂的氣球，和歌曲完全沒有關係。小編弄不清楚誰是何柏誠，誰是李滔均，只記得一個將個頭染到五顏六色，另一個連「咪嘴」都懶嘅人！如果唔知呢隊組合係有兩個人，小編以為另一個人只是背景板，跳又唔跳，唱歌連個口都懶得打開……唉，如果唔想唱就返屋企抖下啦！
FFx —《Sugar baby》
呢首《Sugar baby》一放上YouTube，就已經有過百萬點擊，原因不是歌曲動人或演出者靚到暈的關係，而是因為網民批評她們的唱功和舞步。聽聞MV的製作成本只有900港元，打燈差，剪接亦有延時，歌詞字幕還有好多錯字。當年此神曲一出街，幾乎每個人都在熱烈討論這4位 MK 妹，更笑言當中的舞步和pose，好像身體有某些部位不適，歌曲難聽之餘，還影響視覺享受！
天堂鳥 — 《登陸太陽》
天堂鳥在2014年出道。出道時想模仿韓國那些型到爆的跳唱組合，可惜此曲一出已經成為民眾的笑柄。 Rap又rap得唔好聽，唱歌又麻麻，唯獨是跳舞有點睇頭，然後就找不到其他優點……一出道以為用個特別小小的歌名就以為好爆，可以令大家留意多啲，係就係吸引到人留意，不過全部都係笑緊你哋。大佬吖！咩叫登陸太陽吖……你哋點登陸吖？
莊冬昕 — 《食軟雪糕》
莊冬昕是一位香港創作人，曾經和多位香港著名歌手合作，例如Twins、劉德華、陳奕迅等。莊冬昕雖然好有才華，不過他最具代表性的一首歌《食軟雪糕》真係好攞命。如果成日唔記得歌詞的你，唱K唱呢首歌就最適合不過，因為全首歌大部分歌詞只有「食軟雪糕 雪糕 雪糕」，然後再搭著一些九唔搭八嘅歌詞例如「好想養狗 我任佢任佢wo 好想戴錶 戴住戴住隻撈」，想點吖大佬？小編真係好想知點解，食雪糕會關養狗事呢？可能小編才疏學淺，未能領悟到歌曲中的真理，希望呢個世上會有人明白，然後再講俾大家知吖！
相信大家再次重温以上5首「騎呢」廣東歌後，都忍唔住再笑。唔知你覺得邊首最「騎呢」呢？又或者有沒有一些小編數漏了而你又覺得好笑嘅歌呢？大家不妨留言和大家分享一下！
Edit: Joey Chen
Photo: 網路圖片