10大最討厭的旅伴行為 | 旭茉JESSICA


Hot key words



主頁 / Not-found / Travel / 10大最討厭的旅伴行為

10大最討厭的旅伴行為

Joey Chen2017-06-23

去旅行係開心事,如果能夠約埋一大班朋友,柴娃娃一齊吃喝玩樂就更加正!不過,俗語話「相見好,同住難」,平日間唔中相約食飯聯誼下,就一定有傾有講,感覺好投契;若然真係去旅行要連續相處幾日,甚至同房睡的話,真係未必人人都夾得來!遇著一些「特別旅伴」的話,可能旅程完結時就連友情都終止呀!

以下10項「特別旅伴」會做的行為,你最討厭邊項呢?


第一位︰遲到大王

跟沒時間觀念的人去旅行實在麻煩!明明約好幾點在酒店大堂出發,結果不是遲起床,就是因為執東西而要別人等;又或者各自逛街,約好幾點集合,最終某人因為瘋狂shopping而連累其他朋友齊齊等!


第二位︰話冇意見但其實樣樣都介意

有些人口裡總是冇所謂,十分順得人,一齊討論吃什麼時總說「冇意見啊,我食咩都得。」朋友決定了他就會說「這餐廳唔好食!」又或「哎呀我唔想食呢啲!」總之別人決定了之後又會嫌三嫌四,討厭!


 


第三位︰咩都要話事

冇意見的朋友令人無奈,但諸多意見的人就更麻煩!其實朋友旅行團的意義在於合作和分享,大家有商有量計劃行程,玩都玩得開心啲。不過總有某些人喜歡做領導,咩都要話事,他決定什麼都是最好的!   


第四位︰側側膊唔夾錢 VS 算死草

朋友們無論去食飯抑或旅行,AA制夾錢好正常。但呢個世界總有些人「算死草」斤斤計較,一分幾毫都同你計到盡!相反地,有些人則是「孤寒精」,又或者經常扮冇記性,側側膊唔夾錢。其實最佳方法是每人預先夾一筆「公數」用來作為旅程中的交通費和飯錢。

 

第五位︰selfie影相控

去旅行影相好正常,但係去到邊影到邊,又或每次開餐都要相機行先,全部人等一個人影完先有得食!如果對方selfie叻都算,但有些人只會不斷叫身邊人揸機影自己,仲要影幾張唔滿意要再影過,大佬呀,明星咩?!

第六位︰估不到的鼻鼾聲

有些事真的不能看外表,可能你以為肥人才會扯鼻鼾,心想選個瘦人做旅伴,一齊同房瞓都唔驚。點知朋友熟睡時鼻鼾聲有如雷轟,即使你戴上耳塞都嘈到睡不著,旅程仲有幾晚才完結,點算?

第七位︰同房半夜煲電話粥

同性朋友去旅行通常會為慳錢而同住一間房,不幸的是遇著有伴侶的朋友,總愛凡事向對方報告,甚至半夜三更煲電話粥,真係好滋擾囉!

第八位︰扮識路

去旅遊自由行最緊要識睇地圖認路,如果朋友早認自己是路痴還好,最怕對方愛認叻,吹虛自己什麼都懂,知道這景點在哪?那間餐廳又在哪?結果跟他行大半個鐘才發現走錯方向!


第九位︰沖涼沖成個鐘 VS 唔沖涼瞓覺

無論跟你一起旅行的同房朋友有多熟,他本人的生活習慣你是改變不了的,例如沖涼沖得耐!所謂耐並非半小時,而是足足一個鐘!試想想旅行逛足一整日,梗係想盡回酒店沖涼休息喇,點知禮讓對方卻換來呆等一個鐘!

有些朋友唔會霸住廁所沖涼沖勁耐,而是直情外出逛完街唔沖涼就跳上床瞓覺!試想想房間整晚都瀰漫著臭汗味,點瞓得著?


第十位︰未夠十點要熄燈瞓覺唔俾嘈

早睡早起係對身體好,不過連去旅行都要十點前上床瞓就真係太健康喇!重點係他要你熄燈一齊瞓,如果你唔瞓都唔可以發出聲音令他瞓唔著,想同honey傾電話報平安?唔該你去廁所講!


Photo︰網絡圖片、ViuTV《跟著矛盾去旅行》、《閨蜜》及《天生購物狂》電影劇照

Tag:

Other Articles