閨蜜點解一齊跑J Run? | 旭茉JESSICA


Hot key words



主頁 / Not-found / Health & Fitness / 閨蜜點解一齊跑J Run?

閨蜜點解一齊跑J Run?

Goosie Lam2017-04-03

潮流興跑步,幾乎每個周末都有跑步比賽,但點解佢哋會揀J Run?

其實今朝喺數碼港舉行嘅J Run,已經踏入第11屆喇,有咁多年辦跑經驗,活動當然係愈來愈精彩啦!今年除咗以往嘅3K同8K賽事之外,我哋仲搵嚟Sanrio嘅Little Twin Stars聯乘3公里愛心賽,唔只吸引到一班平日都愛跑嘅運動籽,就連平時無乜點跑嘅女仔,都突登練跑參加,仲開始有少少鍾意咗跑添呀!


閨蜜(左)Yuki同Crystal一齊練跑,仲練埋姊妹情添呀~

J: Jessica Magazine
Y: Yuki
C:Crystal

J. 你哋嘅跑齡有幾長呢?
Y: 我以前有跑開的,但因為返工,有一段時間無跑,係最近一年重拾跑步樂趣。
C: 我嘅跑齡得幾個月咋,哈哈~~

J: 咁點解今年會喺呢度見你嘅?
Y + C: 因為我哋都鍾意Little Twin Stars囉!其實我哋間唔中都會約埋一齊跑步架,當然係報咗Little Twin Stars愛心跑之後,會跑得多啲一齊練習啦!

J: 你哋平時都喜歡一齊跑步嘅?
C: 都會架,不過機會唔多囉!

J: 你覺得跑步最緊要係乜?
Y: 始終跑步要用對腳,一對舒適嘅跑鞋係最重要嘅。
C: 有伴最重要,有伴,我就會有無限的動力去繼續跑!

J: 鍾意獨跑定係兩個人一齊跑?
Y: 自己一個跑悶啲,不過係會認真啲嘅,同閨蜜一齊跑,就梗係開心啲啦!
C: 我覺得兩個人一齊跑,會跑得耐啲,因為佢喺前面砲,我就會不斷追住佢。



(左)Candy同Emily呢對閨蜜,本身並唔係跑步人,但係為咗Little Twin Stars,都可以去到好盡!

C: Candy
E: Emily

J. 你哋嘅跑齡有幾長呢?
C: 其實以前都有跑吓步嘅,但因為工作太忙,慢慢丟下了。為咗今次Little Twin Stars嘅3公里愛心跑,我都練咗一個月架,仲專登同一啲跑開步嘅朋友一齊練跑,信心十足!
E: 嘩,你練咗一個月,我只係練咗兩個禮拜咋。我本身都唔係跑人,為咗Little Twin Stars,我哋都真係可以去到好盡!呢次仲係我哋兩個人生第一次報名參加跑步比賽添呀,Little Twin Stars嘅威力真係好強勁架!

J: 你覺得跑步最緊要係乜?
C: 一對跑鞋當然好緊要啦,但我覺得更重要嘅係心態,如果我跑步係為咗炫耀嘅話,可能會因為夾硬迫自己跑而整傷身體。我覺得最緊要enjoy過程,唔好太計較得失。
E: 我覺得跑步最緊要係要有一份堅持,唔可以輕易放棄,咁當然都要量力而為啦!

J: 你鍾意獨跑定眾跑?
C: 我諗我鍾意自己跑多啲,同人一齊跑,我會好擔心,擔心自己跑得太慢拖慢埋其他人(笑)!
E: 我都鍾意自己跑,鍾意快就快,慢就慢,跑得舒服自在。

其實呢兩對閨蜜平時因為工作時間唔同,好少機會一齊跑,但正因為Little Twin Stars,佢兩個甘願晨早7點半入到數碼港,可見佢哋幾有愛心。佢哋仲話參加咗呢次人生第一個跑步比賽之後,已經愛上咗跑步,以後會多啲參與跑步運動,聽到個人好感動,好熱血呀!

Text+ Images > Goosie Lam

Tag:

Other Articles