垃圾帶落山!齊做「山系清道夫」 | 旭茉JESSICA


Hot key words



主頁 / Lifestyle / Leisure / 垃圾帶落山!齊做「山系清道夫」

垃圾帶落山!齊做「山系清道夫」

Goosie Lam2017-04-20
天氣回暖,人人都開始進攻山林,山上面嘅人多到同旺角有得fight。多咗人走入郊野梗係好事啦,只可惜人多咗,垃圾亦隨之增加。

遠嘅唔講,幾個月前大帽山就有一個經典例子。有班人喺山頂露完營,人就落咗山喇,但啲行裝就全部留低晒。一個爛到穿晒窿嘅帳篷,裡面仲裝滿10公斤垃圾,當中仲有一大堆可以再用嘅物資,包括營燈、地墊......最終,啲垃圾梗係無自己消失啦,全靠兩位有心人,佢哋睇唔過眼,兩個女仔夾手夾腳將10公斤垃圾拖行去最近嘅垃圾站。真係嬲到紅都面晒!

唔好以為呢件係個別事件,如果你平日都有行開山,就會發現而家嘅山野,尤其熱門行山路線,幾乎都唔使絲帶引路,一路上有紙巾、水樽、果皮夾道歡迎。
我諗有好多人行山時見到垃圾都會嘆息或者大罵一番,但嬲係無實質作用嘅,行動最實際。你除咗可以做好自己,唔亂拋垃圾之外,能夠將自己嘅垃圾帶返落山就更好喇。因為掉喺垃圾桶,一來會被馬騮、野豬摷返晒出嚟,二來成條山路咁多垃圾桶,都係得一兩個清道夫處理,佢哋都係同我哋一樣身水身汗行上山,啲山路咁崎嶇,佢哋無手推車架,只係用一支擔挑,就要清晒成條山路沿途所有垃圾桶。以前人少少都仲頂得順,而家旺角咁虛冚喎。一轉清唔晒,眨吓眼又被行山人士塞滿,所以首先做好自己,乖乖自己垃圾自己帶走啦。

如果想再進一步嘅,其實你都可以做清道夫。唔知可以點清?喺Facebook search「山系‧清道夫」,就會見到呢4位愛心型男。佢哋嚟緊會搞好多清潔山野活動,教大家上山執垃圾要帶咩同有咩技巧,更重要係宣傳「垃圾帶落山」嘅意識。

上個月,Columbia就搵埋「山系‧清道夫」4位型男一齊舉辦清潔山野體驗活動。一行20幾人喺魔鬼山行咗一轉,兩個鐘內執咗超過20袋垃圾,然後發現山林裡面嘅垃圾,有90%都係行山人士遺留落嚟嘅。

想再再再進一步,其實喺購買行山裝備時都可以保護環境。行山裝備功能不外乎防水透氣,好似風褸咁,傳統都會加入DWR(防水塗劑),而DWR正正係對環境有害嘅物質,再加上布料染色產生嘅污染物,令生產過程中額外增加10加侖嘅污水,係每一件10加侖呀,即係差唔多38L呀,陰功!

好消息係Columbia呢季終於開發咗新物料,將最新防水透氣膜加咗喺最新嘅OutDry Extreme外套同鞋表面,唔使用有害環境嘅DWR。佢哋嘅最新防水薄膜堅固之餘仲有幾百萬個針孔快速排汗,有啲款可以加內膽,真係落雨落雪也不怕,有啲仲係雙面設計,咁就可以著到永遠啦! 其實少啲shopping都係環保行動,一來製衣過程污染嚴重,二來著幾次就買新嘢,你自己話環唔環保喇!如果一件衫可以冷熱都著得,又可以雙面著,點計都環保啲啦~~

如果你著開件風褸或者行山鞋爛咗,考慮吓佢哋! Text> Goosie Lam Photo> Columbia, 山系‧清道夫 facebook, The Bridge Agency & Internet

Other Articles