Hot key words
牛丸加油！齊撐港隊東方戰水原oppa
Goosie Lam2017-04-12
無論你鍾唔鍾意做運動，鍾唔鍾意踢足球，作為一個女仔，對陳婉婷（牛丸）嘅工作總係會有少少葡萄，當然唔係話葡萄佢個東方主教練之位，亦唔係佢亞洲足協最佳女教練榮譽，更加唔係佢入選BBC全球百大女性，同埋健力士世界紀錄全球首位男子頂級聯賽女教練啦。你諗吓，日日可以同英雄輝（葉雄輝）等一班熱血港足猛將練波喎，如果我份工嘅同事全部都係型男，要我24/7返工我都肯架。
好喇！發夢嘅嘢唔講咁多。叫女仔睇足球，我諗同叫男仔研究化妝品一樣咁高難度，但係睇足球員就唔同喇。仲有唔夠一個鐘，「牛丸」帶領嘅東方龍獅就會喺南韓應戰水原藍翼，我知大家都好鍾意泡菜國嘅長腿oppa，但其實港隊有好多足球員，心心眼指數不比oppa弱架。喺足球比賽開始之前，一齊睇吓兩隊唔同崗位嘅足球員嘅狀態先啦～～
心心眼指數對決：門將 左邊嘅港隊門將葉雄輝，唔使多介紹啦，右邊嘅係水原藍翼嘅門將SHIN HWAYONG。點睇都係英雄輝多啲心心眼啦~~
心心眼指數對決：前鋒 港隊前鋒都係老外居多，心心眼指數最高嘅當然係麥基，而水原派出嘅前鋒，係21歲嘅趙源熙JOO HYUNHO，平頭裝加小白臉，確係有market嘅，不過都係港隊麥基贏！
心心眼指數對決：後衛 港隊東方龍獅嘅後衛，心心眼指數都好高，經過一輪非正式統計後，得到最多心心眼嘅分別係練習時入波都咁開心嘅謝敏榮同埋認真起上嚟真係好有型嘅吳偉超。至於水原嘅後衛，SONG JUNPYUNG應該係最正的了，大家覺又得點？ text > Goosie Lam photo > 東方龍獅足球隊facebook、水原藍翼網頁
