左手又係肉!傑運「星中之星」你點揀 | 旭茉JESSICA


Hot key words



主頁 / Not-found / Health & Fitness / 左手又係肉!傑運「星中之星」你點揀

左手又係肉!傑運「星中之星」你點揀

Goosie Lam2017-03-27

呢個世界唔係樣樣嘢都有得畀你揀嘅,所以有得畀你揀,就更加要珍惜。好似啱啱過去嘅2016年度香港傑出運動員頒獎禮,投票時間雖然一早截咗,但頒獎當晚依然係睇到個人好熱血,尤其係「星中之星」環節,到最後階段基本上係「牛下女車神」同「四眼cue后」之爭。左手又係肉,手背又係肉,兩個嘅表現都咁好,又咁得人鐘意,叫人點揀啫!

其實「星中之星」大獎係由2006年開始增設嘅,咁多年嚟基本上都係由單車代表得獎,其中黃金寶拎過3屆,李慧詩都拎過3屆,王史提芬同郭灝霆亦分別喺09同11年得獎。到2015年,「四眼cue后」吳安儀跑出奪星,令整個頒獎禮再添生氣。前幾日,安儀又再喺世界賽奪冠,繼2015年後再次登上女子桌球世界冠軍之位。搞到今年賽果公布前,大家都係15,16,唔知最後花落誰家。最終,星星再次照耀李慧詩,呢次更加係佢第4次得獎,超越咗寶師兄嘅3次得獎紀錄添呀。

喺頒獎台上,「車神」李慧詩趁機會多謝早前因病去世嘅普林俊教練,佢形容教練係自己生命中一顆重要嘅星星,希望自己都可以成為一顆耀眼嘅星星。真係睇到人眼濕濕!

歷屆「星中之星」得獎名單 2016年 李慧詩(單車) 2015年 吳安儀(桌球) 2014年 李慧詩(單車) 2013年 李慧詩(單車) 2012年 李慧詩(單車) 2011年 郭灝霆(單車) 2010年 黃金寶(單車) 2009年 王史提芬(單車) 2008年 蘇樺偉(傷殘人士體育-田徑) 2007年 黃金寶(單車) 2006年 黃金寶(單車)

至於「cue后」吳安儀,雖然未能「冧莊」奪星,但就同隊友溫家琪一齊奪得「香港最佳運動組合」獎。 其實安儀真係好勤力,而且好愛桌球。上兩個禮拜打完世錦賽,再度登上世界冠軍之位後,返到香港馬不停蹄又出席傑運頒獎禮,然後喺剛過去嘅周末(25日)又再參加香港一間桌球會舉辦的2017桌球精英邀請賽,又再以反勝姿態贏咗喇沙小子潘正潮,雖然之後無緣4強,但唔緊要架安儀,無論比賽結果係點,我哋都係咁支持你架! 2016年度嘅香港傑出運動員選舉就完咗喇,無投票嘅都唔緊要,下年記得要投票!如果畀你再揀一次,你又會點揀呢?

2016年度香港傑出運動員「星中之星」大獎 李慧詩(單車) 2016年度香港傑出運動員 李慧詩(單車) 吳安儀(桌球) 麥卓賢(保齡球) 黃鎮廷(乒乓) 張家朗(劍擊) 鄭俊樑(滑浪風帆) 鄧韋樂(弱智人士-游泳) 梁育榮(傷殘—硬地滾球) Text > Goosie Photo > Internet, 官方網站