小時候的我們不會過濾父母的話，照單全收，不知不覺內化了他們的標準，有些更會形成對自己無止境的要求，這在華人家庭尤其常見。就像背後有隻無形的猛獸，令你要不斷驚慌地向前跑，永遠沒有終點。不是說我們不能被「chur」，但希望不是被那非自己選擇的恐懼鞭撻，而是為了奔向眼前的希望和夢想。

Text：Connie Ho (HealThySelf 創辦人；香港註冊臨床心理學家)

Vivian 從小隨家人移居美國，才 30 出頭，已是著名 PR 公司的部門主管，在這講求經驗人脈的行業殊不簡單。可是，她永遠無法對自己感到滿意。

剛完成了一個重要的 presentation，大家都讚賞她，當刻她也感覺良好。但不消一會，她的腦袋一陣麻痺，開始擔憂起來。

「點解頭先無咩人問問題呢？係咪對我講嘅嘢無興趣？其實大家讚我，係咪只係客套說話……」

這是我們第三次視像會面，在理解一直影響著她人生的 pattern 後，我邀請 Vivian 記下生活中有特別情緒反應的處境。那天，她告訴我這件事。然後我們進行了一次 Float back 想像練習，探索背後的根。

「我想請你合埋眼，諗番當日嘅情形，你見到啲咩？有咩感覺？個感覺儲藏喺身體邊度？」

「得番我一個喺間大房，我覺得好擔心，膞頭好 tensed，個胃有啲嗱住嗱住。」

「宜家試吓放開會議室嘅畫面，但係留心喺胃度嘅擔心……諗番好細個嗰時，一個同樣俾你依種感覺嘅畫面。」

「我喺一個會場 ，裏面坐咗好多人，阿爸阿媽坐係我隔離。我哋係度等緊宣佈一個州際數學比賽嘅結果……我嬴左 …… 我好開心啊，但只係維持咗幾秒，然後就開始擔心，唔知爹哋媽咪點睇。」

「咁佢哋有咩反應啊？」

「佢哋都好開心，有拍手，但係跟住就話，如果你前一晚肯做多啲練習，可能就可以去全國大賽啦。」

「你聽到有咩感覺啊？」

「失望。覺得自己好差，唔夠努力……令佢哋失望。」她緊緊皺著眉，隔住螢幕我也感受到那份痛。

「Vivian ，你試吓想像我入咗個畫面……嗰時小 Vivian 最想點樣？佢最需要啲咩？」

「我想佢哋攬住我，戥我開心，覺得驕傲，想佢哋愛我、完全接受我，而唔係因為我做到啲咩。」她眼瞼下筆直落下的眼淚，無聲無息的。

我著她讓父母從畫面中褪色，剩下我和小 Vivian 。我蹲下來對她說：「你好犀利啊！同咁多小朋友比賽，你竟然嬴左，好叻啊！你一定俾咗好多心機啦！嚟，你宜家想做咩啊？」

「我想去食香蕉船。」她輕聲地說，像覺得自己不值。

「好哇！」在 Vivian 的想像中，我們拉著手去了她小時候喜愛的雪糕店吃香蕉船。

其後一次會面，她沾沾自喜地跟我說上個周末沒工作，與朋友去行山。

「咁你有咩感覺？」

「有啲緊張，因為無去執靚嚟緊個 presentation；又有啲興奮，好似做緊啲曳野 咁。」

「咁點解你唔做野嘅？」

「我知道啲驚喺邊度嚟，我可以去呵下佢，但唔一定要聽佢支笛。已經夠架嘞。I have my life. I have my own way to go.」

過去的遺憾或者無法填補，但今天的我們可以選擇如何面對。

*以上故事純屬筆者從臨床經驗中編寫，並不反映任何個別人士的經歷。

何欣容 Connie Ho
HealThySelf 創辦人；香港註冊臨床心理學家； 靜觀導師；大學講師
曾於醫管局總部、衛生署及社福機構工作，現為私人執業。相信每個人內在都擁有讓生命轉化的力量，希望透過靜觀及心理治療喚醒這力量，使每個人都活得更自在、滿足。
Linkedin @ Yan Yung Connie Ho