每個人屋企都總有幾件IKEA，由門口個鞋架到廁所個鮑魚刷不等。個人最愛嗰張mammut四腳膠凳仔，公司個個designer旁邊都梗有一張，方便我哋對稿時唔使長期彎低腰，舒舒服服坐定定嗱嗱臨趕起個layout。

作為IKEA粉絲，最期待嘅係每隔兩三年出一次嘅PS系列，除咗設計簡約同前衛，又有啲nomad感，最正係件件都係限量架，手快有手慢無，買到嘅證明你係有品味嘅識貨之人。

等咗幾年，PS系列又回歸喇，數吓數吓，已經係第9代喇。今年PS系列集合咗17位來自唔同城市嘅設計師，推出超過50款產品，係有陣「宜家」味嘅designer pieces，有暖氈型外套、茶几型凳仔（係，我認我好鍾意買凳仔），仲有呢張半椅半梳化連18個咕臣，幾得意，睇見都覺得好舒服，好想帶返屋企。
想睇多啲，可以去沙田Homesquare，IKEA將50件正嘢放晒喺中庭展出，展期去到下個禮拜三（3月22日）咋！如果有興趣帶佢哋返屋企嘅話，由即日起至3月尾，喺沙田分店買滿300蚊港紙，仲可以換返本PS 2017筆記薄，都係限量架！

P.S. 呢個PS系列嘅意思，即係前面呢個P.S.（Post Scriptum），即係補充返嘅意思，唔係photoshop執相嗰個PS呀！