情人節晚餐來來去去都係山頂candle light dinner，悶唔悶啲呀！如果你有同感，想搵間有特式嘅餐廳享受浪漫一夜，我提議你去呢度！

齋睇呢個餐廳環境，係咪好有外國風情呢！實情呢度係尖沙咀嘅廣東道嚟架！

而呢個旺中帶靜嘅天堂，就係皇家太平洋酒店嘅Pierside Bar & Restaurant喇！

為咗畀一雙一對嘅情侶共度浪漫一夜，今年皇家太平洋酒店Pierside Bar會喺2月11至14日推出驚喜的六道菜晚餐，以澳洲一流的海鮮美食慶賀佳節。2位合計港幣$1,314元，夠晒好意頭啦~~
大廚話個情人節套餐其實係以「愛的軌跡」為設計主題的套餐，為咗營造醉迷感覺，餐廳會先為你哋奉上Charles de Cazanove香檳，同埋經典凱薩沙律作頭盤，配上自家製醬汁和烘意大利香草包，令人食慾大開。

唔好以為頭盤咁快就完，仲有第二道頭盤等緊你。香焗蟶子，再加一碗澳洲海鮮濃湯，兩款都係以最新鮮的食材炮製，剌激視覺及味覺感官。

兩道頭盤後，係兩道主菜。

第一道係香煎澳洲鱸魚伴松露花椰菜和燉煮露筍，再以紅莓雪葩配酸柑橘松露朱古力清洗味蕾。
第二道有名堂的，叫「天生一對」， 用炭燒高級西冷牛扒配特選鮮龍蝦，加埋香滑薯蓉、西蘭花、梅洛紅酒濃汁，一次過滿足喜愛肉類或海鮮之情侶們。

其實同另一半一齊望住呢個景，食咩都一樣甜蜜浪漫。不過再甜都要食甜品，餐廳的招牌甜點甜蜜花園，以朱古力配自家製雲呢拿雪糕、野草莓、提拉米蘇及棉花糖。

食完呢個甜品platter，真係為浪漫晚晏畫上甜美的句號了。

Text > Goosie Lam