被撒旦吻過的聲音 VS 被上帝放棄的聲音
歌曲有動聽不動聽，但如果去到難聽，耳朵一定受罪。香港雖然歌手輩出，有不少出色的歌手，但同時也有歌手的歌聲就像是被撒旦吻過一樣。就像最近由周啟生監製的新人林羨淇Suga就憑她新歌《男神為你唱首歌》，由於難聽，被不少網友也批評！以下幾位歌手，也被列入「撒旦之聲」的歌手行列，你認為誰才是「撒旦之最」？ 
古天樂
古天樂曾經也是一名歌手，其實連他自己也心知肚名自己唱歌唔多好聽，所以後來索性專注於拍戲，每逢有人叫他唱歌，他也會嬲豬說：「我不會再唱歌。」其實古天樂一開始就不是自願想當歌手，他也曾表示過自己一開始就不喜歡唱歌，二是自己根本就對唱歌沒有自信。話雖如此，但其實古仔當年唱歌也努力過，音樂人伍樂成透露過原來當年古仔對唱歌有點抗拒，要經歷一段時間磨合，他才對唱歌有信心，而且在錄音室時也會反覆練習。古仔於2000年至2004年間出過4張唱片，部分係主演電視劇、電影既主題曲或插曲，當中《男朋友》、《今期流行》、《Mr.Cool》也是家傳戶曉的歌曲！雖然唱歌不屬於好聽，不過他俊俏的外貌，fans望個樣就飽，唱成點唔重要！
黃宗澤
跟古天樂一樣主要賣樣多過賣聲的黃宗澤，其實佢唱歌走音事件真係好出位！除了「2008年度勁歌金曲頒獎典禮」被抽中與陳奕迅輪流唱《K歌之王》唱到上氣唔接下氣、狂走音外，佢喺2013出席《勁歌金曲優秀選》，唱出佢既代表作《最後祝福》時，第一粒音已經走音，好貫徹佢既唱功！電視大台真係俾好多機會佢，除了演戲外，仲支持佢唱歌，佢仲曾經簽約東亞唱片做合約歌手，於2008年黃宗澤推出首張人個人EP “In love with bosco” 兼得過最受歡迎男新人銀獎；2010年推出次張唱片”Bravo”，兩張唱片都得到金唱片的成績架！相信其實佢唱歌都應該有佢既吸引之處，走音係佢既特色啫！
汪明荃
點解阿姐汪明荃對唱歌咁有信心？睇一睇資料，原來阿姐汪明荃於1969年已經開始出唱片，1975年她出了三張極受歡迎的唱片《黛玉葬花》、《紫釵記》和 《清宮殘夢》從而成為當時的一線歌手。1980年她的兩張唱片《京華春夢》和《千王之王》賣過滿堂紅，是她歌唱事業最高峰的一年。1982年《勇敢的中國人》和《萬水千山總是情》等歌曲也成為經典金曲。當年佢啲唱片咁好賣，成績咁好，仲係一線歌手喎，自然信心爆棚。兩年前阿姐再度憑著《華麗轉身》主題曲一曲再度hit爆，令人不禁回味阿姐唱的《少女的祈禱》和《給自己的情書》，高登友更形容佢唱到似《給自己的遺書》咁款！而阿姐既歌聲，更被網民形容為「被撒旦吻過的聲音」；小編聽過，其實並不如形容中咁難聽，只是阿姐用了幾十年前的唱腔唱現代流行曲，大家聽不慣啫！不過阿姐的高音又真係震撼左少少，連佢最引以為傲既粵曲，也如是。不過一位70歲還可以咁自信地唱歌跳舞，真的不能不佩服。
張曼玉
同阿姐一樣，Maggie的歌聲曾被網民形容為「被上帝放棄的聲音」，她的「地獄嗓」只要聽一次，必定令你一世難忘！她在2014年北京草莓音樂節上唱了一曲，便成為頭條，真的十分厲害，真的好少有歌手可以有一唱就令人記住既能力！佢低沉又厚實既聲音，十分獨特，有人覺得她那獨特的煙嗓聲線十分迷人。其實一直以來她都知道自己唱歌會走音，她更曾表示以前跟朋友去卡啦ok，大家都不讓她唱歌，以前面皮薄，自信心受打擊所以一直都唔敢唱歌。不過因為電影《Clean》中，佢飾演一個竭力擺脫毒品爭取撫養權既搖瀼女歌手，因為劇情需要，佢首次獨唱咗4首歌，結果Maggie被呢個唱歌既空間吸引住，最重要係因為劇組既紐約音樂製作人Dean & Britta 俾左好大信心佢，告訴佢好多有名音樂人既歌聲都唔完美，都會經過電腦修飾。結果Maggie愛上音樂，花了兩年時間學習怎樣做音樂、剪輯；2012年，在一個晚宴上Maggie首次獻唱了自己創作既作品《Visionary Heart》；2014年Maggie 50歲，她跟中國最大的獨立音樂公司簽約，正式加入樂壇。而同年在草莓音樂會節的獻唱，甚至被人形容為「被上帝放棄的聲音」，但她沒有放棄；2015年花了半年時間錄製電影歌曲《如果沒有了你》；2016年終於推出了個人單曲《Look in My Eyes》。很多人認為她的吸引力不在於聲線，而是她對音樂的認真與執著。不過都係果句，有誠意不代表做得好，其實每個人天生就有不同的天賦，唱歌可以當興趣，自己天天唱沒問題，但明明沒有天份，何必硬要挑戰別人的耳朵？
Text: Roanna Lee