時裝設計師近年密密玩爭櫈仔，大牌如Givenchy、Chloe、Lanvin換將都少不免在時尚圈引起話題，但都冇2018年甫開始這單咁「爆」：Hedi Slimane落實頂替將2月離任的Phoebe Philo出任Celine創意、藝術及形象總監！時裝友普通認為這消息「Surprise!」，雖然LVMH主席兼首席執行官Bernard Arnault稱Slimane為「這時代最有才華的設計師之一」，很高興他回歸。但係我有嘢想問……

張櫈坐幾耐？

大家可能不知，Celine與傳媒合作有非常嚴格的guidelines：不准混搭其他牌子、不夠班的雜誌不合作、不借衫給形象唔啱的明星、活動少搞，即使搞也是低調而非常selective……呢啲可能同大家都冇關係，我想講的是，Celine自從10年前Phoebe Philo執掌後，成為了神級牌子，一切策略明顯見到Philo走「簡」、「精」、「個性」路線，反而時裝人更趨之若鶩，你明的，極罕而你能沾上邊，你贏！根據《Business of Fashion》的資料，Celine在2017年的年度銷售額超過7億歐羅，吸金程度厲害，而LVMH今次邀Slimane回巢，會新增男裝及訂製服裝系列，創舉！預計今年年尾推出新香水，明年開設全球第一間Celine男裝專門店，咁多搞作，咪就係想賺到盡囉。問題嚟喇，照咁樣一年10個系列另加無數個大小配飾系列，Slimane頂得住冇？頂得幾耐？睇Slimane往績，藝術家是不會委屈自己死撐到底的喔，好快byebye並唔出奇。

男人很愛他，那女人呢？

Slimane在時尚圈吃得開，多得兩位舉足輕重的大腕：一是老佛爺，江湖傳聞他曾邀Slimane接任Chanel創作總監一職；而Slimane在Dior Homme（2000-2007年）期間，老佛爺為了著得下他的極窄設計，瘋狂減肥90磅，可謂經典。另一位是聖羅蘭50年的老拍檔Pierre Berge，早於Dior Homme之前，他已欽點Slimane做YSL男裝設計師，2012年Slimane再度任Saint Laurent男女裝主帥，還奉旨給這法國老品牌從名字到設計上徹底大翻新，結果評價各走極端，有說他的設計是非常貴的Marc By Marc Jacobs、Michael Michael Kors、Zara……總之水平根本不達標，Berge就咁睇：「Slimane唔鍾意social，唔鍾意接觸人，尤其是記者，所以人緣一般，况且，世上怎可能有第二個聖羅蘭？」換句話講，天才嘛，總是不愛守規矩，偉大的設計師應該走在時代之前，重新定義當代美學。照這邏輯，Slimane今次也是揹著rebranding的mission？難怪坊間估計Slimane的加盟或者會令LVMH的業績翻兩翻，但亦很可能流失Céline的鐵粉，所以增設男裝是買個保險？

得罪人多？

無疑Slimane是最有商業價值的設計師之一，以前人們稱他時尚金童子，當「不知誰夠分量頂替有地位的元配」時，Slimane就是「不會出錯」的選擇。Slimane的確有才華，至於他能否符合上頭的期望，那又涉及營銷手法了。還記得「Ain’t no Laurent Without Yves」標語tee嗎？是戲謔Slimane將牌子名字YSL改成SL，Colette因出售該tee惹怒了Slimane，期後雙方不曾再合作，直至Slimane離開SL。依家網絡社交、同名人搭膊頭已成為增強品牌影響力的遊戲規則，Slimane咁自我，他的圈子好可能只有一班冷門音樂人，鬼識咩！世界變了，「做人無公關，食屎架喇」，佢明唔明？

後記

身邊時裝友在選擇Slimane和Philo之間進退兩難，Philo的Normcore新極簡風的確是sophisticated女子的福音，感覺我們終於找到真愛，如果Slimane將Celine變成「加細碼rock n’roll飛仔飛女」, 我會喊！必須承認，Slimane的Cool是年輕、是叛逆、是某種時代面貌，但是，我去Topshop就好！但是！一切言之尚早，我期望期望期望（重要的事情講3次）Slimane長大了！期待9月他的首個Celine系列！

資料來源：www.vogue.co.uk, www.nytimes.com