今個農曆新年的紅日在星期二、三、四，如果頭尾請多兩日大假就可以有九日長假，諗落都好吸引。如果你正有此意，咁你有沒有計劃趁著這個假期，去遠一點，plan個長線旅行呢？以下3個長線旅行的國家，不單只可以讓你放眼世界，而且每個景點都是「打卡」位。如果你還未有頭緒，不妨考慮呢3個國家吖！

 

極光之旅 — 冰島
在你一生入面，點都要去一次冰島！因為當你去到那邊，所見到、經歷的任何事物都會令你大開眼界。而且每年9月至4月都是睇北極光的黃金時期，雖然睇北極光就好似你去買六合彩咁，要碰運氣！除了睇北極光，Iceland 都有好多自然景點或者冰上活動可以體驗。先來，當然要去由火山熔岩形成的地熱温泉Blue Lagoon去浸一浸，敷下天然面膜啦。然後你可以按照自己的興趣，選擇參加不同類型的day tour，例如爬冰川、Iceland 必去的Golden Circle、冰上電單車、搭直升機睇火山等。
  

當上午的行程結束後，晚上就可以參加tour去看北極光。他們會先記下你住的酒店名字、單據編號，然後就會車你去一些遠離市區的地方去「追極光」！如果你第一晚就見到那就恭喜你，相反，假如你第一晚看不到的話，他們會每一晚來接你去追光，直到你看到或是你要離開Iceland為止。聽落好似好正，不過當你要挨眼瞓，凌晨3點鐘還要在外面吹著冷風等「它」的來臨，你就會明白追光其實好慘……當然如果你有足夠的金錢，你可以入住玻璃屋，在床上攤著等極光。

Blue Lagoon地址: Nordurljosavegur 9, 240 Grindavík
開放時間: 星期一 -星期日 08:00 – 22:00

熱辣辣過年 — 杜拜
杜拜是其中一個著名出口石油的國家，而且擁有著一大片沙漠和全球最高建築物 — 哈利發塔。杜拜一年四季都是夏天，最高氣溫可達攝氏45度以上，雖然當地溫度咁高，但當地的女士們都要遵守宗教教條而穿上長袍，作為遊客的你當然要尊重這個國家，不能穿得太暴露。如果你想過返個熱辣辣的新年，杜拜都是一個不錯的選擇。
 

除了可以看到壯觀建築物 — 哈利發塔之外，其實你還可以在多個超大型商場盡情地shopping！唔鍾意shopping的你，可以去大型水上樂園玩吖。而Aquaventure Waterpark內的其中兩條滑梯就最為特別，因為當你滑到最低，你就可以透過玻璃見到好多條鯊魚游來游去。去到杜拜又點可以唔去參觀一下，距離杜拜市中心要兩小時車程的Abu Dhabi市內的Sheikh Zayed Grand Mosque Center呢？好動的你，一定要留半日行程去desert safari，坐在四驅車上體驗沙漠衝沙，然後坐在一大片看不到盡頭的沙漠上看日落和吃一頓杜拜餐。喜歡多元化活動的你，杜拜真是一個不錯的選擇！

Aquaventure Waterpark地址: Atlantis The Palm – Crescent Rd – Dubai 
開放時間: 星期一 -星期日 10:00–17:30 
Sheikh Zayed Grand Mosque Center地址:  Sheikh Rashid Bin Saeed St – Abu Dhabi
開放時間: 星期六- 星期四 09:00 – 22:00、星期 16:30 – 22:00
  

聞名古蹟 — 土耳其
近年有唔少人都好鍾意去土耳其，特別係去卡帕多奇亞(Cappadocia)玩熱氣球！要去Cappadocia先要在土耳其首都伊斯坦堡，轉坐內陸機就可以到達這個以怪石聞名的小鎮。這個地方之所以有著不同形狀的怪石，是因為火山灰侵蝕所致。順著地勢，當年的土耳其人便開鑿基督教堂及躲避敵人追殺的地下洞穴，而這些地方全都被列為自然及文化雙遺產，所以去土耳其一定不能夠錯過這個有趣的小鎮！除了睇石之外，第二樣必做的事情就是玩熱氣球。當你一飛上天上，你就會看到多個熱氣球在你左右，場面壯觀又美，絕對令你難忘。
  

玩完這個小鎮，你可以飛返土耳其首都伊斯坦堡，繼續參觀多個世外聞名的景點，當中一定唔少得蘇丹艾哈邁德清真寺又名為藍色清真寺(The Blue Mosque)。寺內用上20,000塊當時紅極一時的建築材料 — 伊茲尼克花磚，並以藍綠色和暗藍色為主，所以被人稱為藍色清真寺。這個地標清真寺亦被列入為世界遺產，每年吸引許多世界各地的遊客去觀光，雖然是遊客區，但寺廟仍然會供信徒朝拜、祈禱使用。如果你要進入寺內參觀，無論男或女性，都不能穿著得暴露，而女士們一定要把頭圍著，最好能包住所有頭髮，以表尊重這個教派！

蘇丹艾哈邁德清真寺地址: Sultanahmet Cami, 34122 Sultanahmet, Fatih, Istanbul
開放時間: 08:00-18:00 (穆斯林教徒做禮拜時謝絕入內，正門門口的告示牌會提示當日的可參觀時間，基本上每天會有3段左右的時間開放參觀。週五的時候可能參觀時間會縮短。)
  

唔知以上3個國家中，你最想在長假期去哪一個國家放眼世界呢？

 

Edit:Joey
Photo:網路圖片