平時跟情人拍拖都係行街睇戲食飯，無理由連情人節都係一模一樣，不如去下啲新地方，影下相、傾下偈，不知幾愜意！今次推介5個拍拖遊給大家，可以跟情人玩足一天，無論對方是浪漫主義、消費主義定休閒主義，都有不同選擇給大家！記住浪漫係由自己製造！

建議1：飽覽維港新蒲點─海港城觀景台

唔知大家有冇發現，海港城LCX已經再延伸咗！海港城花咗近5年時間建造的的全新觀景台「海運觀點」於10月已經開放，跟情侶們喺海港城shopping完，book定枱撐枱腳之後，可以同情人手繫手逛下觀景台，飽覽270度維港靚景，而且呢度仲有2個活動平台，一個是天然草坪，另一邊是石地，咁靚既維港，又有咁sweet的情人在身邊，仲唔盡情打卡？海港城新大樓更開了幾間有名的餐廳，如來自米蘭的Paper Moon和日本料理天穴等，都係跟情人吃情人節晚餐的好選擇。

建議2：漫步心鎖長廊─愉景灣

經常喺市區玩真係悶悶地，比較西化的愉景灣Discovery Bay絕對是情侶拍拖勝地，一來碼頭附近有好多不同餐廳，望住海景同情人燭光晚餐不知幾浪漫。而即將的情人節，愉景灣更以「情約二月 緣牽中西」為主題，D’Deck及愉景北商場不單以桃花佈置全場，情侶可以漫步星燈點綴粉紅色桃花亭、與情人於4米高喜鵲桃花園裡盪鞦韆、免費換領愛情心鎖於愉景灣心鎖長廊上、跟情人乘坐歐式觀光車欣賞風景，還有於情人節當日在大白灣沙灘上燃起千點心形燭光，再加上一頓浪漫的情人節晚餐……還不是一個完美的情人節？詳情請留意香港愉景灣Facebook。

 

建議3：休閒睇日落─石仔灣碼頭

同情人一起看日落夠唔夠浪漫先？喺馬灣旁有個石仔灣，喺香港僅有存的舊漁村，而且仲保留咗漁排和木橋碼頭，喺木橋上可欣賞到屯門公路及向西海岸，欣賞日落一流。今次喺健康之旅，同情人由馬灣碼頭出發，沿著整個馬灣行，會發現昔日馬灣的漁村風貌，仲有天后廟、舊馬灣村，還可以看到汲水門大橋，當然要在日落時份去到石仔灣睇日落，之後回到東灣海灘旁的餐廳，對住海灘吃晚飯，是休閒又寫意的拍拖之行。

建議4：日落海景海鮮團─下白泥

如果你是郊遊一族，當然唔可以錯過去下白泥，位於元浪流浮山，可以睇到最靚既日落！由於泥灘上有水的倒影，於一望無際的泥灘上欣賞日落晚霞，就好似看著一幅立體的真畫一樣，超靚！早一點就要去下白泥，先感受一下大自然的美景，再看日落，然後再與情人去流浮山吃海鮮，這樣的情人節也不錯呢！

 

建議5：迷人城市遊─郵輪碼頭

唔一定坐郵輪先可以去郵輪碼頭！其實由舊啓德機場改建而成的啓德郵輪碼頭有公園又有長廊，可以欣賞維港兩岸迷人的景色，又有靚草地可以野餐，仲有特色的建築設計，欣賞城市的日落又有另一番風味。最重要係因為近市區，啱晒城市人。記住早啲book定九龍灣星影匯既VIP影院，同情人行完郵輪碼頭或野餐後，就去附近的九龍灣星影匯看movie，呢度既VIP影院有超大豪華皮座，真係可以瞓喺度睇4K 全景聲電影，仲可以一邊睇戲一邊吃豐富套餐，啲食物仲幾唔錯，呢個情人節約會，夠晒舒適！